飯局試過不少的古法鹽焗雞以大酒家為主，想不到配套有限的街坊小廚也有呢味手功菜
今年《米芝蓮》的必比登推介加起來有68間之多，但撇開有緣小聚、沾仔記呢類幾十蚊已吃到「翻艇」小吃店，剩下來有特色而又抵吃餐館大家心中有數，有次和一眾業內朋友忘年小局，大家新年都洗大左，平平地又唔想得太差，買鋪大細來到天后的石記廚房碰碰運氣，看看這家連獲兩年車胎人推介家坊小廚古法鹽焗雞水準如何。
家庭式經營的店子晚晚爆場，早個半星期訂才勉強找到張大檯，人客多流量快，壞處是招呼靠自己對手穩陣，好處是貨散得快材料相對地新鮮。
和只一街之隔的澤田小廚不同，這裡菜式較傾向於酒家菜，好似其中兩味招牌菜鹽焗雞同焗魚腸，功夫多亦耗時，非一般廚子處理得來，為了唔錯過唔知幾時會再來的機會，所以就一早訂定菜，除了以上兩款名物外，也預留手打墨魚餅，其餘菜式打天才波即場叫。
一來阿姐就推介老火湯，瓦鍋煲的霸王花瘦肉湯，足料無味精，夠熱又醇厚，對於經常唔夠營養的我，又是多多益善的家庭補品，當日所見做完首輪生意，到第二批客已售罄，大家來的話訂定穩陣。
忘記那位天才想吃南乳骨，隨即叫來一客，我無試到，睇樣也看不好壞，只信朋友說炸得脆但南乳味只是一般，感覺是如是擦得者，一試無妨。
砵酒生蠔煲用鐵鍋上，導熱快散熱也快，要快吃，用的只是普通的本地生蠔，勝在爆得夠香又不過火，加上甜而惹味的醬汁，夠十人分才$108，亦真的吃得過。
 |
| 蛋滑而味道濃郁，老式味道。 |
焗魚腸如是飯局的話最少打孖上，但是夜想試多兩味，所以只訂一砵好了，每人一啖試試味，好的話留返大家日後自己返兜，看一副「包公面」以為燶乾，但蛋漿卻不過乾也有甘潤濃郁魚腸脂香，只是魚腸微微見腥，否則就更滿意，有機會來是值得預訂一試。
雖然我吃不到黃金蝦這樣重口味東西，但開年總不能沒有笑哈哈吧，叫來讓大家試試，席上做餐廳的朋友亦說不錯。
鹽焗雞是炒熱粗鹽去焗，但看樣子又唔多有焗過，試一口，雞肉其實幾嫩滑也醃得夠味，而雞黃油很香是鹽焗過的味道，比起港大雖然差了半班，但在雞肉每下愈況的年代，收貨了。
 |
| 超人氣港式原創小菜。 |
煎墨魚餅份量慷慨，煎得甘香，粉無幾多而入面全是墨魚和少少肥肉提味，入口爽而有滿滿「膽固醇」風味，做餐廳的朋友話損耗高「賺粒糖蝕間廠」，貨價日日升，趁仲有得食要食多件。
蒸水蛋無特別，勝在夠滑，不過對於一個左戒右戒的人，這味家常又健康的菜，其實已是很不錯的佳餚。
其後兩味煲仔飯，想不到的好吃，前者泰式風味辣肉碎是手剁肉粒，惹味有口感，而重點是飯很夠米香，飯焦唔多是走原汁原味路線，季節料理，見到有就不要錯過。
埋單唔洗三舊，在席幾位一當三吃的朋友都捧著肚走，其中好幾味招牌菜也是真材實料，唔介意招呼（其實伙計態度是友善的只是人客太多難以同時兼顧）同環境的話，值得大班朋友來吃下懷舊土炮風味。
－－－－－
消費：$$$（每$代表$100）
滿意度：＊＊＊ 1/2（以5＊為滿分）
推介：墨魚餅、鹽焗雞、焗魚腸、生蠔煲
建議人數：10-12
評語：值得推介
菜式：港式
石記廚房 Shek Kee Kitchen
地址：港島天后銀幕街17號地下
電話：2571 3348
No comments:
Post a Comment