傳說的手打魚肉燒賣@呂仔記

忙完飯局才有自己的時間找些簡單東西填肚

都唔少人宵夜的。

煲仔飯局總算抹一額汗地完成，附近的餐廳也收得七七八八，簡吃，伴我成長的碗仔翅也不錯，於是就來到人氣小店呂仔記，半夜，也不用登位是個好處。

埋位就來碗魚肉生菜兩溝，阿姐都好有禮咁問要唔要招牌真正魚肉燒賣，明知都要故問，佢話是拆魚肉打的，既是人氣名物，也要一試吧，雖然好貴。

吃得太多粉加豬肉味的燒賣，有口感的魚肉，好吃談不上，但感覺無咁化學。

廿皮八粒，上了「色」奉客，吃起來軟熟不太粉，雖然無甚魚味但口感上就比坊間的燒賣真實一點，如果大家吃過帶點豬肉味的工場燒賣便知分別，吃了兩三粒後要留肚吃翅，阿姐就代為打包，服務唔錯。

至於碗仔翅除了材料豐富外，肉絲和木耳絲都切得細緻，也較易消化，湯底也比出面做得好，不是純靠味精「拉」味貨色，魚肉也實淨，至於生菜純粹是那天無綠色東西下肚才湊拼一起，比起車品品用外國品種的生菜，這裡就遜色多了。

雖然價錢唔平，但味道都比出面自然，在牛丸無牛的世代，貴少少吃個安心，路過不妨一試。


－－－－－
消費：$（每$代表$100）
滿意度：＊＊＊ 1/2（以5＊為滿分）
推介：碗仔翅、魚肉燒賣
建議人數：1-2
評語：一試無妨
菜式：港式

呂仔記
地址：港島筲箕灣筲箕灣東大街121號A地舖
電話 : 2885 8590