街坊熟意的小廚房＠自家煮意

碟底沒剩半滴汁甜酸排骨，想不到在街坊茶記遇上

同朋友吃飯揀餐廳訂檯寫菜的工作向來都是我負責，難得今次朋友想試一間新的地方小廚，我當然拍手說好，其實就同搞飯局一樣，唔需要做Admin的前部份工作，只需影相同寫報文報告，工作量輕上了一半。

位置就在大中華附近，自問非硬皮烤豬fans所以也少來這頭，想不到小街開滿了不同風格的店子，有些港式西餐甚至兼賣一口牛脷粒、鵝肝釀雞翼，真的蔚為奇觀，還好朋友並非帶我入大觀園，試的叫自家煮意，吃的是新派港式小菜。

大家都在等吃雞煲。

茶記佈局，七時許來到只得小貓三四隻，冷氣大凍得要穿外套，到坐埋位後愈夜愈旺場，幾張檯已開始架陣開爐吃麻辣雞鍋，附近年輕人清一式喜歡重口味，也難怪我們問靚姐有甚麼推介時，亦二話不說叫我們試雞鍋。

唔少原創小菜值得一試的。

還好朋友是正常口味，而自家小菜系列都是正常人亦吃到港式料理，有趣是蟲草花、櫻花蝦等近年流行的新食材亦會用上，每道菜例牌$58，加四蚊有埋湯、油菜同白飯，幾人除開其實平過幫襯大家樂，亦較連鎖快餐碟頭飯更適合share，適合喜歡撈亂試的我們。

比較純梅頭肉，有骨落碟的部份較合我口味，是不錯的街坊小菜。

靚姐做事看似漫不經心，但問起推介菜，都能說出獨門之處，比方押上店名的梅都骨，她說是排骨位，炸的，墊底配有炸辣椒葉。簡單兩句解釋，也看到出伙計有歸屬感，老闆為人該不差，試了小口炸排骨，雖然有少少梳打，但情況不算嚴重，配起甜甜酸酸的汁醬好開胃。

無化學過的牛腩，對比一眾茶記的梳打牛肉來得天然同有誠意。

朋友叫的三弄回鍋牛肉，以為是切片牛肉，竟不知原來先把坑腩炆好，再回鍋連同醬汁快炒，牛肉炆時已入了味，亦做得鬆腍，而回鑊後表面帶少少焦香，再扣上汁醬就更惹味，是很聰明又好吃的做法。

不吃非損失。

阿姐推介的紅酒燴牛尾，配角竟然有青瓜，賣相奇特，而牛尾想當然是急凍貨，炆得不夠入味，而肉質散修修，汁醬也比不上朋友在家煮的出色，除非你是喜歡汁醬和牛尾各自成文的味道，否則可放棄這味。

通菜是夏天少有的當造菜類。

櫻花蝦通菜，雖然只是普遍的蝦米，難得在於通菜無瀉水，加上蝦乾提味，砂鍋上熱辣辣，吃得過的，只要你唔介意價錢同回鍋牛肉等值的話。

例湯味道亦很濃郁，當然少少師傅是免不了。

吃近三小時，雖然旺場但阿姐亦無白眼趕客，服務是可以的，而愈夜場來傳來的雞鍋口味就愈重，頂唔順埋單去也，唔介意環境的話，平平地也值得來一試，你會吃出老闆對出品是有誠意，小店加油。


－－－－－
消費：$（每$代表$100）
滿意度：＊＊＊ 1/2（以5＊為滿分）
推介：三弄回鍋牛肉、自家梅都骨
建議人數：3-4
評語：值得推介
菜式：港式

自家煮意 D&D Kitchen
地址：九龍長沙灣青山道413號東景大廈地下4-5號舖
電話：2742 1860