無立錐地之人氣冰廳！～金華冰廳

人氣度絕不下於金鳳的冰廳，非必要定不會來打搞，但為帶老外見識無立錐之地的「老茶本色」，本了命來一鋪。

不太「絲襪」的茶陣，但另有別注賣點！

港式茶記有唔少吸引老外注目的奶茶，只要「茶陣」強就連蘭芳園都不愁無客路，當然來到金華，就有老茶的另類價值去見識。

入到來，人龍密得連地版都見唔到，莫講話櫈！

雖然檯位有限，加埋唔夠四十個位，但兩位老伙計總有橋去將店內多達十幾位的人龍，化整為零，而期間伙計仲攝到時間介紹影相角度，效率之強真唔到你唔服！

短短十幾分鐘，已經見到兩～三次的出爐麵包了！

茶記也分兩類的，自設麵包爐的話唔洗教都要叫出爐麵包，否則就叫炸雞髀、薯條去好了，這裡隔無十分鐘就有「特技」睇，老外問都唔問，就指著要試試。

雖然未叫得上出色，但作為港式fusion麵包的元祖之一，也要見識下。

CNN介紹的鮮菠蘿油令檯檯都叫，但試過後其實除了夠睇頭外，砂糖皮頗硬不是我喜歡的味道，不過老外又未試過將甜皮夾著鹹牛油的吃法，覺得廣東人是天才。

不是金鳳的密實類型，但餡豐富，亦值得一試。

比較起來，我更喜歡這裡的焗雞批，新鮮出爐，酥皮特別鬆化外還有芝麻香，餡的麵粉密度雖不及金鳳飽滿，但加入了菇和帶肥的煙肉，還有帶甜雞粒，味道豐富，收$8雖唔平但連埋名氣計，無收貴了。

奶茶幾滑的，比蘭香園高幾班。

全程十三分鐘連絲襪奶茶都飲完，老外才如夢初醒知要埋單趕下一站，他問茶記都是這樣的嗎？我笑說香港租金貴，唔做到快、靚、正點夠交舖租？之後，過兩條街去吃炸醬麵吧！

消費：$25
滿意度：＊＊＊（以5＊為滿分）
推介：雞批、茶啡
建議人數：1～2


金華冰廳
地址：九龍太子弼街47號地下
電話：2392 6830
備：最低消費$12／位