人氣燒腩仔！@Mian壹碗麵

MIAN，港島東的人氣麵．食店

由設計師成功轉型廚房佬，米高可是位每日都親自落手落腳的主理人。

認識過不少對飲食抱有理想的主理人，但在汰弱留強的市場上，有熱誠不代表可以生存到，至少要守住物有所值這基本原則，一字咁淺的道理其實亦唔易做得到，尤其小本經營的小店，由熱誠淪為蹉跎真的屢見不鮮，很少有壹碗麵的米高那樣，屢敗屢戰，但憑傻勁捱出自己風格的人氣店子。

和富道的舊舖開始，小本經營到成為食友的飯堂，可說是北角小店奇葩。

傻佬米高的故事一疋布咁長，無幾耐前北角舊舖捱不過加租光榮結業，脫了苦海後唔識死又再跳回地獄，在則魚涌重張旗鼓，重生前的幾天，就同幾位朋友來見識下新店作風。

舖位比舊店大少少，加上過往「瀨野」經驗，檯凳雖然密，但擺位較往時聰明，就算迫夾但亦保留到一點空間感，而佈置亦看出一點玩味，至少咁多張凳無兩張是同款的，夠神奇吧？

開新店絕對是收買人命的工作，記得當日新到連杯碗都未買齊，大門仲整緊，阿老闆半邊身做食物QC，又半邊身處理裝修雜務，對飲食無咁上下熱誠，就算幾捱得都好難撐到開張日。

不容錯過的流心醉蛋！

鮮肉有價，一個例牌都只賣$98，也難怪近期常聽到食友說來到已售罄。

廚房比舊店大，款式卻比往時少，像日本人那樣貴精不貴多的去做，專注就是好，好像這款用上新鮮豬腩肉做的燒腩仔，肉夠潔白，肉汁與肉味兼富，皮也焗得香脆，比往時不修篇幅的樣子進了一大步。

新鮮豬肉味道和冰鮮肉是兩回事。

米高雖然非廚房出身，但天生手門好，尤其精於製作豬肉菜式，另一款炆豬腩仔也是鮮肉做，見汁收得很好，而當日同來的朋友雖然剛吃了豐富午餐，未落隔下都清到碟，足見水準。

半隻都只不過$108

鎮店招牌菜水準更勝舊時，另一方面亦有驚喜的新餸，貴妃雞是其一，雞肉用上湯浸煮，肉軟嫩亦夠味，很適合幾位朋友分享。

限量供應的獨家美食，賣相靚仔又好吃！

而比較起雞，其實我更欣賞「有味飯」，用上湯把白米在鍋上生煮，蝦米加上白飯魚仔提味，飯如其名認真夠味，之後午市來過幾次都吃唔到，原來是每日五點先會「開壇」，限量鮮製只供應晚市，實在是簡單又美味的必吃推介。

走專門路線，菜式水準更勝從前，幾位朋友每位一百幾十已經可以試好幾款自製招牌小吃，也難怪每星期也不時被食友包場的照片洗板，旺場得晚市也要預早訂位，否則準吃閉門羹，就算我們的要在這裡包場「麵局」，亦只能隔兩星期「包到一次」，第三局已排到七月中，證明物有所值的手作仔小店，不愁沒有知音。

－－－－－
消費：$（每$代表$100）
滿意度：＊＊＊＊（以5＊為滿分）
推介：以上菜式
建議人數：6-8
評語：值得推介
菜式：港式

Mian 壹碗麵 
地址：港島鰂魚涌濱海街48號地下
電話： 3482 9981